Барааны тайлбар:

Амьд байхын утга учир автомашин, орон байр дээр тогтсоор л байна уу? Аль эсвэл амьдрах гэж идээд, идэх гэж амьд явна уу? Tавлаж байгаа юм шиг уншигдаж байна уу ? Аав, ээж, ах дүүс нь сайн биз дээ? Цалингаас цалингийн хооронд, том бага, эрх мэдлийн зөрүүнд нухлуулж гүйнэ үү? Бусдын л нэгэн адил утсаа шагайж, алгаа "маажиж" алхана уу? "цахим" ертөнцөд "чухам" булаалгасан цаг хугацаандаа та харамсдаг уу? яг над шиг. "цахим" ертөнцөөр тэгээд сонин сайхан юу байна даа? Шинжлэх ухаанаар батлагдаагүй эрүүл мэндийг эмчлэх шидтэй "жор", хоног хормоор тураах увдистай, үйлчилгээтэй бараа бүтээгдэхүүн, яг л "дэлхийд анх" гэж байгаатай адил сонсогдох "монголд анх, анхны, анхдагч" үйлчилгээний сурталчилгаанууд, олонд танигдсан "од"-дын унасан машин, унтсан хүүхний тухай "сенсациуд", улс төрчдийн ууж идэж, "унгаж" урвасан "шуугианууд", хурдан баяжих арга ухаан, дэлхийг донсолгосон тэрбумтануудын сургааль, өөрөөс бус өрөөлөөс бурууг хайсан тэмцэгчид, өдөр шөнийн алинд нь ч ялгаагүй нэр зүс нь үл мэдэгдэх, компьютерийн дэлгэц ширтэн "гар" балбагчид, элдэв төрлийн сонин хачин зураг хуваалцан баяжихыг мөрөөдөгсөдөөс авхуулан уур уцаарыг тань барж л байна уу? "цахим" хуудсан дахь "лайк" "шэйр" нь бурзайж л байгаа биз дээ? Алхам тутамд таарах тантай, надтай, бидэнтэй яг адил ахан дүүсээ адлах хэрэг бидэнд байна уу ? Асуултаар дүүрэн орчлонд хариултыг хаанаас хайх вэ ? эсвэл хандлагаа жаахан өөрчлөөд үзэх үү? Хариулсан хариулт хүртэл асуултанд ороогдсон тойрогт, өгөх гэхээсээ илүүтэйгээр сэдэл төрүүлэх гэсэн оролдлогыг минь дэмжиж номны минь хавтасыг уншиж буй танд баярлалаа.
Н.Х.Т

#1016